红色的梦
词：呷玛拉松
曲：索扎
编曲：旦旦
录音：旦旦
Yeah I wanna say something about my life
སྙིང་ཁྲག་མེ་རུ་འབར་བའི་ལོ་ཟླའི་ནང་།
ཁ་བ་དང་བུ་ཡུག གྲང་རླུང་དང་ལམ་ཐག་གྲོགས་སུ་བྱས་མྱོང་།
རེ་དོགས་དང་ཕུགས་བསམ་ལ་རྔམ་པའི་ཁྱོད་དང་ང་།
ལོ་ནས་ལོ་དང་ཟླ་ནས་ཟླ་བཞིན་
ཞག་ནག་སུམ་བརྒྱ་དྲུག་ཅུ་མིག་ཆུ་དང་དཀའ་སྡུག་ཁྲོད་ནས་བཞུར་སོང་།
ཁྱེད་ལ་དབང་བའི་ཕུགས་འདུན་ཞིག་ཡོད་ལ།
ང་ལ་དབང་བའི་རྨི་ལམ་ཞིག་ཡོད།
དེ་ནི་ལྷ་ཡི་ལུང་བསྟན་ཀླུ་ཡི་བཀོད་པ་
གང་ཡང་མ་ཡིན་པར་སྙིང་གི་རྟུལ་ཕུད་ལས་འཁྲུངས་པའི་རེ་བའི་དྭངས་མ་དེ་ཡིན།
བརྩེ་སེམས་དྲོད་མོ་དེ་ཁྱེད་ལ་གཏད་ཡོད།
རེ་བའི་མིག་ཟུང་དེ་ཁྱེད་ལ་བགྲད་ཡོད།
ང་ཡི་རྨི་ལམ་དམར་པོ།
ཁྱོད་འཚོ་བ་ཡི་ཁ་དོག་ཡིན་ལ།
ལང་ཚོ་ཡི་བཀྲག་མདངས་ཡིན།
སྙན་འཇེབས་ཀྱི་གླུ་སྐད་རེ་རེ་རྨི་ལམ་དེའི་རྒྱུད་རིམ་ཡིན་ལ།
ངལ་དུབ་ཀྱི་རྔུལ་ཆུ་རེ་རེ་རྨི་ལམ་དེའི་ཟིལ་མ་ཡིན།
ལམ་ལ་ཆས་དགོས། ད་དུང་འགྲོ་དགོས།
ཤ་ཟད་རུས་ལ་ཐུག་ཀྱང་འགྲོ་དགོས།
རུས་པ་ཐང་ལ་བརྡར་བཞིན་འགྲོ་དགོས།
ལང་ཚོ་མཛེས་པོ་འཇའ་རེད།།
ཕུགས་མདུན་འཇའ་ཡི་མདངས་རེད།།
ལས་ལ་བསྐོས་པ་མེད་ཀྱང་།།
ལམ་དེ་རྒྱུད་ནས་འགྲོ་དགོས།།
སོ་སོའི་སེམས་ན་ཡོད་པའི།།
སེམས་ཀྱི་རི་མོ་གྲུབ་ཉིན་།།
འཇིག་རྟེན་སྲིད་པ་འདི་ཡི།།
བདག་པོ་ཁྱོད་དང་ང་ཡིན།།
རེ་བ་དེ་རྒྱང་ལ་བཅོལ་ཡོད།
ལམ་སྣེ་དེ་རྒྱང་ལ་གཏད་ཡོད།
གླུ་རིང་བོ་ཐང་ནས་བླངས་ཡོད།
དབྱངས་སྙན་མོ་བྲག་ལ་འཁོར་ཡོད།
དབྱངས་རྟ་ལ་རྒྱུད་པའི་གླུ་ཚིག་རེ་རེ་
རྨི་ལམ་དམར་པོའི་གཏམ་རྒྱུད་ཡིན་ལ།
གཏམ་རྒྱུད་དེ་ན་རེ་བ་ཡོད།ཡིད་ཆེས་ཡོད།
ཕུགས་བསམ་ཡོད།
སྙིང་སྟོབས་ཡོད།
ད་དུང་ཕམ་ཁ་ལས་ཐོབ་པའི་
རྔུལ་ཆུ་ཛ་ར་ར།
མིག་ཆུ་ཤ་ར་ར།
འོན་ཀྱང་ཆེ་དྲགས་པའི་རེ་བ་དེའི་དབང་གིས་
མགོ་བོ་ཡར་ལ་བཏེགས་ནས་གོམ་པ་མདུན་དུ་སྤོས།
ཁ་གིས་ཨམ་གཙིགས་བསྡམས་ནས་སྤོབས་པ་དགུང་ལ་གཏད།
ཀི་བསྭོ་དང་ལྷ་རྒྱལ་ཁྲོད་ནས།
བཀྲ་ཤིས་དང་ཁ་གཡང་མཉམ་དུ་ལམ་ལ་ཆས་དགོས།
ད་དུང་འགྲོ་དགོས།
ཤ་ཟད་རུས་ལ་ཐུག་ཀྱང་འགྲོ་དགོས།
རུས་པ་ཐང་ལ་བརྡར་བཞིན་འགྲོ་དགོས།
ཕུགས་བསམ་རིང་མོ་དེ་མ་རྙེད་བར་དུ།
རྨི་ལམ་དམར་པོ་དེ་མ་འགྲུབ་བར་དུ།
ཡོད་ཚད་འདོར་ཆོག
ཡོད་ཚད་གཡུག་ཆོག
རེ་བ་དང་ཡིད་ཆེས་ཅན་གྱི་ཁྱོད་དང་ངས།
བརྗེད་མི་ཉན་པ་ནི་སོ་སོར་དབང་བའི་རྨི་ལམ་དམར་པོ་དེ་ཡིན།
ལང་ཚོ་མཛེས་པོ་འཇའ་རེད།།
ཕུགས་མདུན་འཇའ་ཡི་མདངས་རེད།།
ལས་ལ་བསྐོས་པ་མེད་ཀྱང་།།
ལམ་དེ་རྒྱུད་ནས་འགྲོ་དགོས།།
སོ་སོའི་སེམས་ན་ཡོད་པའི།།
སེམས་ཀྱི་རི་མོ་གྲུབ་ཉིན་།།
འཇིག་རྟེན་སྲིད་པ་འདི་ཡི།།
བདག་པོ་ཁྱོད་དང་ང་ཡིན།།
Yeah this is my life
འདི་ནི་ང་ཚོ་ལ་དབང་བའི་རྨི་ལམ་ཡིན།
