Pagana preghera
Calieghja u sognu, a bughjura gualagna,
Lacrimeghja u celu in la notte più pagna,
À tanti malcamini l’albore ci cundanna.
Anu rottu i patti i birbanti putenti,
prufanat‘anu tutti i so gran’ghjuramenti,
Chì solu i prufitti sò i so sacramenti.
Si macìnanu l’ómi quant’è tribbià u granu,
Anu bacini colmi è mundigli’ùn ne danu,
Tantupochi ringrazii calate’ùn ne sanu,
Elettrònichi ragni tessenu a so tela
Da ricopr’à l’umani è richjode a reta
D’acciaghju è di piombu sott’un pannu di seta
À tintena tuppata i mercanti furdani,
Compr’è vendenu tuttu om’è paesi sani,
Ghjuchend’à test’o cigliu i nostri lindumani
È sò órchi ingòrdi à curà lu macellu,
Di u sangue nucente chì corre à guadellu,
Da tace ogni mughju è fà corre u sbèlu.
Aiutu signadori ! allibbiate l’affanni !
Cappiate lacramanti quelle forze tercani !
Da fà ghjimbà signori è imperii suprani.
Tardelleghja a vita in ‘sse mane feroci
Scunghjurateci voi di ‘ss avvenni attroci
Insegnate ci l’anda da francà quelle foci.
Parole : Claude Bellagamba
Musica : Jérôme Casalonga
