Gulê
Erê hay lê lê Gulê, hay lê lê Gulê, hay lê lê Gulê, hay lê lê Gulê, hay lê lê Gulê hay lê lê Gulê, lê lê
Ê le mi go beşna karî xezala dilê mi zirav e, takî rîhana li perê çiyakê bêxwedîka vê Mûsilê, sebra mi de, hê lê lê
Mi dî Gulê vê sibê bi sê denga dikir gazî digo lo lo lawiko, mehrûmo, min ê vê sibê cilê delalîkê dilê xwu tev hilayî, tev pêçayî
Erê hey la lê dayê min ê berê xwu da ser ava Çemê Diyarbekir
W’ez ê gava diçûm ser ava Feratê Diyarbekir
Wele min ê bala xwu dayê şopa qatirçiyê sêrtiya bû
Guherê miya bû, mexelê boşî deva bû
Wey la devê mi digo dilê min ê ji devê mi ra qerar nedabû
Min ê cilê delalîkê dilê xwu neşûşt û li avê nedabû
Hey wax mi porkurê, hay lê lê
Na na wele min ê vê sibê ta cilê delalîkê dilê xwu tev hilabû, tev pêçabû
Min ê berê xwu da ser ava Çemê Cizîra Bota bû
Min ê bala xwu dayê di ser me ra selexane li ser bû
Av û arava spiya bû, hûr û pizûrê miya bû
Ê le devê mi digo dilê minê ji devê mi ra qerar nedabû
Min ê cilê delalîkê dilê xwu neşûşt li avê nedabû
Hey wax mi porkurê, hê lê lê
E rê hey la lê dayê, li mi porkurê, mi bala xwu dayê, ji mi wê da çem nemayê
Di ser mi ra dax û gelî û çiyayê
Min ê berê xwu da vî çiyayê belekê berfê lê xuyayê
W’ez ê gava diçûm belekê berfê wî çiyayê
Mi bala xwu dayê, bi sê tiya, sê ciya çem û kanî û ava zelal jê kişiyayê
Wele li wî çiyayê li belekê berfê li sê ciya ava li çol û yabana Xwedê, min ê kuçikê xwu çêkir, sê heb kevirê xwu danî
Sîtila xwu li ser danî, teşta xwu li ber danî
Serê bihara ewil bû, paşiya payîzê dewamiya neh meha li çol û çepela ber teşta cilê delalîkê dilê min li min danî
Wele li wî çiyayê takî êzing qe nemayî
Sabûna min keçikê barê hif deva bû, qediyayî, pirtikî jê nemayî
Le teşta mi qul bûyî, sîtila mi şikiyayî
Tilî, pêçîkê min ê zerî karîbanî, di ber av û arava cilê delalîkê dilê mi da giş mehiyî
E rê hay lê lê Gulê, hay lê lê Gulê, hay lê lê Gulê, hay lê lê Gulê, lê lê
Ê le beşna karî xezala dilê mi zirav e, takî rîhana li perê çiyakê bêxwedîka vê Mûsilê sebra mi de hê lê lê
De rê hay lê lê Gulê, hay lê lê Gulê, hay lê lê Gulê, hay lê lê Gulê, hay lê lê Gulê, lê lê
Hey la li mi porkurê, min ê gava cilê delalîkê dilê xwu şûşt û li avê dayê, min ê digo w’ez ê cilê delalîkê dilê bavêm ber tavê, germa payîzê zor e, wê bîna tavê jê bê
Min ê cilê delalîkê dilê xwu avêtî ser darê darçînê, gulê miswagê, siya serê sibê bîna bimbareka misk û emberê ji xwu ra ser darê jiyayê
Wele min ê cilê delalîkê dilê xwu tev dayî, tev pêçayî, gava li me hat rojê eydan û şayayî, delalîkê dilê min ê cilê xwu nê li bejna xwu ya zirav dayî
Ez ê li qarşî sekinîbim, mîna eynikê li ser memirê camîa şewq û şemalê tîşk û tîrêjê royê didayî bejn û bala mi karî xezala, tê ra lê xuya yî
Mi dî lawiko ban dikir digo hey la Gulê mehrûmê, destê te bişkê, çavê te birije, roniya te rijiyayî, cilê min ê di kela beroşê da mayî, hey wax mi porkurê, hê lê lê
Mi dî lawiko ban dikir digo wey la Gulê mehrûmê, te çi kir û way te çi nekir
Mala bavê xirabiyê, sibe ye te çi kir û wayê te çi nekir
Wele tu yê vê sibê rabû qesta mala me kir
De destê xwu avêtî cotê cêra, riya kanîka biniya mala me mene kir
Ez ê li ser rêka te bûm malxirabê, sibe bû, tu derbas dibûy, çima ji mi ra silav nekir
Na na wele Gulê bi sê denga dikir gazî, digo lo lo lawiko, mehrûmo, mala bavê te şewitiyo, bi sonda qesemê, w’ez ê narim kaniyê avê
Ti bala xwu bidi nava milê mi keçikê, bûxça cila w’ez ê dirim tiraşoyê, kaniya mezin ji şûştinê dîsa li baravê
Le qayî derdê dila pir zor e, keçikê ji kezeba şewitî digo w’ez ê cilê teres, qebraxê bav û birayê xwu bişom bi avê yo, bi aravê
W’ez ê cilê delalîkê dilê xwu bişom bi sabûnê, bi gulavê, bîna misk û emberê, şîrê qîdabê, xwedîka wê hûr û xunavê
Na na wele eger tirsa qebraxê bav û birayê min ji lomê şeytan û fesadê gundê me nebane, mîna sancaqa ordiyê royê sê cara w’ez ê li qarşî çavê te bisekiniyama min ê sî û sêbiskê xwu ya bişê şe kira berda nava cotî zermemika, hetanî navê
Eger xelkê bigotana Gulê mehrûmê çi bû, çi ciriya, min ê bigota gundîno, malîno, Xwedê hebîna, wun ê loman û gazina ji min nekin
Ê le derdê dila pir zor e, ji bûna xatirê wê xeberê, wê galgalê, wê silavê, Gula mi de hê lê lê
E rê hay lê lê Gulê, hay lê lê Gulê, hay lê lê Gulê, hay lê lê Gulê, hay lê lê Gulê, lê lê
Ê le mi go bejna karî xezala dilê mi zirav e, takî rîhana li perê çiyakê bêxwedîka, wê Mûsilê, sebra mi de hê lê lê
